مستشفيات 5 نجوم

كل مرة في البداية أواجه صعوبة في كيفية كتابة المقدمة
أو ما ادري من وين ابدي الكلام
اليوم بقولكم سالفة
قبل جم يوم كنا قاعدين أنطالع التلفزيون أو مره وحده مسكني ذاك العوار
اللي بكليتي و قمت اللوي من العوار
أو خذاني ريلي أو رحنه احد المستشفيات الحكومية
أول ماوصلنه عند باب المستشفى ولا موظفين الاستقبال من عند باب السيارة
اللي يركض ايبلي عربانه والثاني ياخذ السيارة من ريلي أو يقوله تفظل الكرت احنا نصفطلك اياها
مع العوار اللي ماسكني أو الدهشه من المنظر اللي شفته للحظة نسيت اني مريضه
أو دخلنا المستشفى أو يركض فيني الهندي على غرفة السسترات أو ياخذون الحرارة والضغط
أو ريلي راح يقص لي كرت على ماخلصت من غرفة السسترات أو ياب رلي الرقم
اللا دورنا ياي تخيلو يا اخوان كان اهناك تقريبا 10 دكاترة بالطوارء
أو ماكو شي اسمه دور بسرعة البرق يوصلك الدور
أو العالم كلها رايقه أو فايئه أو محد يتهاوش أو المكان كله هدوء
جنك بفندق 5 نجوم
أو يوم دخلت على الدكتور مابقى شي فيني مافحصة أو مابقى تحليل ماطلبة
قالي لازم انجيك على كل شي مره وحده
أو ياخذوني جزاهم الله خير
أو يطيرون فيني بغرفة ماشفت مثلها من قبل
أو كل مريضة بغرفة الملاحظة كانو مخصصين له سستر
أو مره وحده السستر اللي فوق راسي قالت لي مدام بس بنركب لج درب
مريم مريم قومي يالله يا دورنا
ماشفت جدامي الا عالم فوق بعض صافين دور على غرفة الدكتور أو ريلي مأجر له اثنين مصاكه على شان يفتحون لنا الطريج
ونقدر اندش على الطبيب صراخ وهواش
وبطلعت الروح قدرنه انشوف الدكتور
النفسيته بخشمه أو ضغطه مرفوع
أو مامده يقولي اشفيج
اللي يرن تليفون أو طار من على الكرسي و العالم بره اتكسر الباب
أو الحاله حاله أو ننطر على هالحال فوق النص ساعه
شرف الدكتور مره ثانيه قلنا له عسى ماشر دكتور
قال لا ماكو شي بس كان في وحده بتموت
أو انشاءالله لحقتو عليها
بعد ياي يومها شنو كان بيدنا
اي اختي شنو اللي يعورج ؟!
وتتكرر هذه المأساة يوميا في مستشفيات الكويت
ناس تتألم او ناس ادلل او ناس التموت
او لي الحين ما شافت الدكتور
او من عقب ما تشوف الدكتور هذا عقب طلعت الروح
او تتحول على الملاحظة اللي في سابق كانت غرفة في الحاضر صارت ممر
السراير في الممرات المرضة على على كبر المستشفى
اييك احساس حالة قصف في البلاد !!
متى راح نزدهر في مستشفياتنا !
متى راح ينصرف لنا دوا غير البندول ا ودوا الكحه !
متى راح أنفضل العلاج بديرتنا بدلا من المطالبة للعلاج في الخارج!
هل راح نحس بتغير في عهد الساير ولا بيتم كل شي على البركة ساير
يا الله احفظ كويتنا من كل مكروه
وجعل الحكمة في ولاة أمرنا
و يسر لهم دربهم
وجعل الاصلاح منهجهم
آميــــــــــــــن يا رب العالمين