أنا رديت لعيونكم .. والله لكم وحشه

السلام يسبق الكلام
ومن بعد غيبه طويلة حبية أبديها أب أحلا الكلام
بسم الله الرحمن الرحيم
في غيبتي الطويلة كنت بلويه او دوامه ما يعلم فيها اللا الله
او الحمد الله على كل حال
بس صج فقدت ألكتابه فقدت البلوق فقدتكم ..
صارت أحداث وايد في الفترة اللي فاتت
او كانت ايدي اتحكني أبي اكتب شي لكن ما كان عندي وقت
الحين ما ورانا ولا علينا انبلش حش
انتشار بنات او شباب الماك جيكن بشكل رهيب بالديره
لدرجة حتى الوافدين صارو يقلدون الماك جكنات الكويتيين
و السوق في حالة تنزيلات مستمرة
نتيجة للركود الاقتصادي الرهيب
في جميع المجالات ما عدا الأكل الوجبة اللي بدينار صارت اب دينار او 990 فلس
اشو بس زادوه 99.9 %
فهوا المجال الوحيد اللي أسعار بزيادة
و زحمه عندهم جميع فصول السنة
عندنا معرض كويتي وافتخر
بصراحة شهادتي مجروحة بالجان المنظمة
و الحملة الإعلامية الكبيرة او تتوجيها بغناء بلبل الخليج
او زرت المعرض لكن بصراحة صدمني مستوى العرض
بصراحة في شغلات حلوه لكن خل انكون واقعيين ليش هل الأسعار الخيالية
يعني بنات يبيعون (( تيجان )) التاج الواحد من 30 او طالع ؟! مع ان جميع المواد من البلوكات
هذا إذا مو الهنود اللي في البلوكات مسوينهم
و الكيك طبعا كل بنات الكويت صارو حرفنه في المطبخ بسرعة خياليه وسر يكمن
في ارفف الجمعيات اللي فاضيه من كراتيين الكيك الجاهز..
وتبيع لك الحبه اب دينار او نص وسعر كرتون الكيك ما يوصل دينارين
(( ادري البعض بي يقولي تجاره او شطاره او رزقهم ليش محتره السالفه مو حرا لكن خل يكون عندهم منطق يعني على ابو كويتيه تظربين اب هل الأسعار ؟ او يريت مخترعين الذره كلها كيك لو يسون موبايل جان اب جم راح ينباع !! ))
وعجبوني المصورين اللي كانو في المعرض بصراحة فنانين او شهادتي فيهم مجروحا لأن صج تصويرهم عجيب
من ناحيت الملابس بالفعل كان في تصاميم جميله للبنات كويتيات او اللي اعجبتني في وحده مسويه تيشرتات عليها شعارات الكويت قديمه او دامجه الحديث بالقديمة بشكل فني رائع
او طبعا في البعض اتعبوا من الطلب من امزون او غيره او كل منتجاتهم من النت ما فيها أي ابداع كويتي الا انهم ادفعوا فلوس
يعطيهم الف عافيه بنات او شباب الديرة على تعبهم او ما قصروا
او على الصعيد السياسي اعتزلت متابعة مجلس الأمة نهائيا
بس هل الأيام اشوف معتفسين على سالفة خصخصة البترول
او الله يستر من ورا هالسالفة
او تألق تلفزيون الوطن في اوبريت الكويت لمن أحبها
صج ردونا على أيام اوبريتات سناء الخراز
او كان الاوبريت رائع من كلمات او أزياء اخراج الحان من جميع النواحي يعيطهم الف عافيه
او بالأخص البنات و الصبيان اللي أبدعوا في الغناء الله يحفظهم ويخليهم حق أهلهم
ويي برنامج الصياعة ودروس قلة الأدب بجميع أنواعها و أشكالها وجهة المراهقين و المرهقات
ستار اكادمي و الملاحظ ان مع كل سنة يزيدون جرعة قلة الأدب اللي فيه
مع مشاركة كويتية عبدالعزيز لويس او يسمحون لي جميع معجبينه ولكن عن نفسي يذكرني في (( نبيل )) ولد بونبيل اللي (( بوقتادة او بو نبيل )) مادري ليش يذكرني فيه
برنامج (( كنز )) غير علينا روتين التلفزيون الممل
من بجي المسلسلات او أدراما مجلس الأمة
و انحدار مستوى الأغاني و البرامج
في هل البرنامج رجعوا الأبتسامه و ضحكه للكل كبير وصغير
يعطيهم الف عافيه على هل المجهود الجبار
سوري طولت عليكم
أنشوفكم على خير

فبراير يتعدى على أملاك الدولة !!

أمس في برنامج ليالي فبراير
ما بقى شي ما قالته المذيعة المتألقة إيمان نجم
عن خيمة (( زين فبراير )) للأطفال
او شيشية عيالنا كلهم
ولي يقول بيبلبس علم الكويت
ولي يقول بدق على عيال خالتي
وفلم عندنا بسبت خيمة زين
تخيلوها اليهال انها شبيه بقرية مدهش اللي بدبي
كل واحد كان قاعد يرسم في مخه شكل الخيمه
و الوناسه اللي بيستانسونها اهناك
طبعا يومها ما نامو اللا الفير
او ما قعدوا لا العصاري على ما البسو
او تيمعو عيال خالتهم
او اتجهنا الى شارع الخليج
مقابل سوق شرق
و لا الصدمه
كل جهات الدولة كانت موجوده هناك
الخيمه محوطه بالشرطه
و كل الالعاب اللي بالخيمه بالسكه
و كاميرات الاخبار
بيني او بين نفسي توقعت ان شابه حريجه بالخيمه
و اليهال صمت رهيب
نزلت الدرشه او كلمت مراسل تلفزيون الوطن
أخوي شسالفه اليهال يبون يلعبون مو هذي خيمة فبراير !!
إي عدل كلامج أختي بس لجنة الإزالة اسبقتكم
او بتشيل المكان !!
من الصدمة قمت اضحك
اليوم من الصبح كنت مصبحه على لجنة الإزالة عند باب البيت
تبي اتشيل مظلت السياير
او العصر بودي اليهال اللعاب او هم لجنة الازالة شايلة اللعاب
اظاهر لجنة الإزالة مستقصدتني

لديك صفر دينار ...

صارلي جم يوم ادق عليه بكل لهفه اني اسمع شي حلو
اسمع كلمه اطيب خاطري كلمة اتغير مزاجي
كلمة اتخليني اخذ نسم عميق لمه اسمعها
او للأسف يكون الرد القاتل
الصاعق
المتوقع ..
لديك صفر دينار .....
او حزتها تبدأ سلسله من التحلطم على البنك او على الدوام او على كل شي
طبعا الشخص اللي امه داعيه عليه اللي ايي يكلمني عقب هل المكالمة
لأن نفسيتي اتكون بخشمي
بس مع كل الازمات كنت اصر على اني ادق مره ثانيه او ثالثه او رابعه
على و عسى اسمع شي غير صفر دينار
و بالفعل امس عقب صلاة المغرب
او توني راكبه السيارة او طول الطريج
و انا ادق عليه
قالي اياها سمعني اياها اذوني مو مصدقه
صج انها صاعقه شي كهربني غير مزاجي
قالي اللي ودي اسمعه
سمعني الكلمة اللي ناطرتها من جم يوم
الي حسيت ان الايام صارت اسابيع على شانها
اخيرا برد جبدي او غير مزاجي او قالي لديك XXX.596 دينار
يا حلوه من خبر
طبعا على طول طقيت فوق حدر او دايركت على البنك
و الصدمه اني لقيت الكويت كلها اهناك
ناس صافه دور على المكاين هذا غير ساتول السيارات
و انا على بالي اني بس انا اللي متحرقصه على المعاش
اثاري هذا حال كل من على هالديره
ما جذب من سماه معاش لأن عمره ما عاش
لأن من ينزل تشتغل الفيزا و الماستر اتخصم
هذا غير السيارة غير الاتزامات الشهرية
ما يعدي سبوع بالكثير
اللا او تبدي ازمت الانتظار لشهر الياي ...

مفاهيم

الصدق و الكذب
العلم و الجهل
الحب و الكراهية
التعاون وتفكك
الجرأة و الوقاحة
و المتبع في حياتنا ....
عدم تصديق الصادق
الوثوق بالكاذب
العلم أصبح يشترى بالمال
الجهل أصبح من سمات العقلاء
الحب من الصعب العثور عليه
الكراهية متواجدة في كل مكان
التعاون حلم صعب المنال
التفكك واقع و حياة
الجرأة بالطرح المعتدل معدومة
الوقاحة لغة بادت سائدة في مجتمعنا
جميع المفاهيم أصبحت معكوسة
كل شي يمشي عكس التيار
مفاهيم في السابق كانت وسمة عار
و في الحاضر أصبحت واقع لابد من التعايش معه

للمرة الأولى نتفق أنا و هايف ...

انا من اشد المعارضين لأفكار هايف ولكن للمرة الأولى أتفق ويا على راي واحد
بخصوص منع الشيخ العريفي من إلقاء محاضرات المجدولة له مسبقا من قبل وزارة الأوقاف و الشؤون الاجتماعية
و معارضة النائب هايف للموضوع و مطالبة الوزارة برجوع عن قانونها وألا سيحضر قائمة طويلة من الأسماء اللي المفروض تمنع على أساس المبدأ الذي يريدون ان يمنعون به العريفي
ف إن كان العريفي قد تعدا على المرجعية الشيعه من خلال السيسيتاني
فهناك الكثير و الكثير من سادت الشيعه الذين يتعدون على زوجة الرسول عليه الصلاة و السلام و على أصحابه الصديقين
فهل السيستاني أكرم من زوجة اشرف الخلق و أصحابه المبشرين بالجنة ؟؟
فإن كان هناك خطوة لمنع العريفي من دخول البلاد فيجب ان تكون نفس الخطوة بمنع السادة الذين يتطاولون على عرض الرسول صلى الله عليه وسلم و أصحابه .

أسئلة فاره مخي اللي عنده الإجابة حياه الله

ليش أغلبية الناظرات مو متزوجات ؟
ليش الأغلبية العظمة من المدراء شايفين روحهم ؟ ( مع إن ما نولد مدير )
ليش إذا صار مسئولك رفيجك تستغله لي الآخر ؟ ( أتحلل أيام معرفتك فيه عدل  )
ليش إذا صرت مسئول عن هنود اطلع دهنهم ؟
ليش المدرسات كلا يحشون ؟
ليش موظفات الحكومة كلا ريوقهم صمون مشكل ؟
ليش صاروا الريايل يحشون أكثر من الحريم ؟
ليش 103.7 كل يوم الصبح يحطون أغنية طابور الصباح ؟
ليش 103.7 مذيعينهم وايد ظريفين ؟
ليش و أنا راده من الدوام أبطل الرادو اسمع مغني ( اعتقد العروج ) وكل الاغنيه يقول فيها (( أمبيه )) ؟ (هذا مستوى أغاني 2010 !)
ليش كل الكويتيين شايلين في ايدهم بلاك بيري او آي فون ؟
ليش بعض المتحجبات صار لبسهم كلا بلايز قصيرة او بنطرون سكني ولا لقن ؟ ( بعد ليش متحجبة ! )
ليش كل الكويتيات صاروا مصممات ؟
ليش كل فريج في الكويت صار فيه معرض ؟
ليش كل بنات الديرة صاروا يبيعون كب كيك ؟
ليش الكل يشتكي من (زين) مع إن لي الحين عندها اكبر عدد من العملاء ؟ ( مو عاجبينكم حولوا حق غيرهم :q )
ليش بعض الجاليات يوم الجمعة بذات تلقونهم صافطين سيايرهم في مشرف على السادس او دار مدار المحول و يشون ويخيمون و يوصخون او يمشون ؟
ليش عبدالعزيز المسلم وكل الممثلين اللي وياه وايد يحركون راسهم ويخزون ( نور عيني ) ؟
ليش كل الكويتين صاروا مزارعين في الفيس بوك ؟ ( اتهقون بسبة لجنة الإزالة ! )
ليش اختي عندها ترشيح او الحين صارلها فوق 6 شهور ناطره اللي جدامها بالديوان تتزحزح و الاخت معانده  ؟ ( او كل مادقت عليها قالت لها ممكن ترفضين على شان أتوظف أتقولها انا ابي المكان اللي انتي يايبت له ترشيح (( اش هالنحاسه )) )
اضافات القراء :
غير معرف
ليش كل البنات شايلين جناط أكبر من راسهم على بو موضة؟
ليش كل الكويتيات صارت روسهم أكبر من أجسامهم؟
Q8-HANDICAP
ليش صار بكل فريج بنات ايسون اكسسوارات ؟؟؟
ليش كل البنات بين كلمه وكلمه ايقولون كلمة ((حرام)) ...... ((حرام)) ؟؟؟
الـسـنـبـلـة
ليش كل الكويتيين مو عاجبهم شي بالديرة و بس يتحلطمون ؟
ليش كل فريج بالكويت صار فيه تجمع أو حملة سياسية ؟
ليش كل كويتي ما يصدق تصير أي سالفة بالديرة إلا سوالها قروب بالفيس بوك ؟
Amani
ليش الجينز السكيني وحجاب بو تفخه والبوت ابو لمعه وبوز من جدام والبدي الصيفي علاق وتحته بلوزه شتويه بيضه صاار جنه زي وطني بكل مكان اشوفه بالضبط ليش الهلاقه ؟؟
ليش كل وحده تمر من صوب ال AUK صارت خلاص من بنات ال AUK ما عندها سالفه غير اي لما طلعت من باركينج ال اي يو كي ولا لما مريت من صوب باركينج الاي يو كي الخ الخ الخ .. مع انه للعلم الباركينج مال ال AUK تبع الحكومه والجامعه اصلا ما عندها باركينج ؟؟؟

أصبح رصيد صفر صفر ....

الحين بينت نواياه الطائفية
بطلبه إزالة إعلانات مركز وذكر
مع أن غمض عينه عن إعلانات الحسينيات
اللي تترس بنيد القار او غيرها من المناطق او تعلو كل حسينيه
او غمض عينه عن اللي يوزعون مشروبات او أكل بدون ترخيص
او غمض عينه عن الخيام اللي تنصب بدون ترخيص مقابل الحسينيات
والمعارض ألي تقام بدون ترخيص
هذا غير تشغيل المكبرات الصوتية في المناطق السكنية في أثناء الخطب الحسينيه او هذا مخالف للقانون
و أيي على مركز وذكر او ينذره بل إزالة ..!؟!؟!؟!
لماذا لا تطبق على الحسينيات مثل القانون اللي طبقه على مركز وذكر ؟!؟!
إذا كان الأمر بتطبيق القانون فل تكن عادل في تطبيقه وتبدأ بإزالة مخالفات الحسينيات قبل مخالفات وذكر .. لكي تكون فعلا خايف على مصلحة الوطن لا مصلحة المذهب ..