العالم كل صباح

صباح الخير اجمعين

يسعد لي صباحكم او قواكم الله على الجهاد اليومي

اللي عايشين فيه يوميا

بصراحه نقدر انسمي جهاد شوارعي

على ما توصلون الدوام

تبلش المشكلة او الجهاد من تركب سيارتك

قبل لا طقها سلف او تكتشف سايقكم الحلو كاسر مساحة السيارة

على ابو يبي يغسلها بضمير

ويبلش عدادك يرتفع مع حرارة السيارة

تونا يهادي جدامنه درب وحركت من البيت

و انت داش اللفه ايك باص مدرسة بويهك يعطيك بريك يصحصحك

هدلي بالك ترا صج اللي سوا الباص غلط بس على الأقل صحصحك شوي

ونبلش فلم الدوائر تنزلك على اي دائري بالكويت

طبعا الدائري واقف كلا او كل مداخلا طابور مثل طابور الخبز ايام الغزو

او نتعمق شوي بالشارع نمسك الملك فهد

للعلم ان واقف من جسر صبحان الى ان ينتهي الشارع

السيايير في حالة جمود

بس نزل السايد او خل السيارة على البركة وحيلك في البريكات

طبعا كل من دار مدارك صار متأقلم على الوضع

أو تلقى الناس أنواع الصبح او نقدر انقول كل سيارة يكون لها عالمها الخاص

تلتفت يمينك تلقى الام ماسكه كتاب الاجتماعيات او تتلي على ولدها

الي قاعد ورا او على اساس انه يسمع المسكينه اللي انبح صوتها جدام

و الاخ طاقها شخري واذا بي ايقوطي الاكلنيكس على راسه

انا صوتي مبح و انا اتلي او حضرتك نايم قوم اسمعلك كلمتين تستفيد منهم بعد شوي

ديييييييييييد ديييييييد هرن قوي من مصري

اذا ماطق هرن مايصير مصري

السيارة اللي على شمالك بنت بالعشرينات

او معتجله اب جنظة المكياج

اهو شدو اهو بلشر اهيا كحلة حتى الاي لينر التخطه واهيا بالسيارة

يعني مومخليا بخاطرها شي

لأن المسكينه يدوبك التصلي الفير او تركب السيارة مايمديها تتزقرت ولبا بس تلبس اهدومها

فعلى شان جذي تكون السيارة الصالون المتنقل الخاص فيها

قواج الله يوبا ..

زين توا شوي تحرك الشارع

هذا اللي على يمينك اش قاعد يسوي

لا مو من صجه

الاخ نايم اي والله نايم

الابو سهران بالدوانية البارحه

او غصبن عليه بي يودي اليهال

ف الحبيب قاط راسه على الكشن وشخري و العيال

اللي نايم و لي ياكل ولي مسكين يفكر بالشارع

يوباااا يالله مشا الشارع حرك

الله يعينكم

و اللي على اليسار

واحد شكلا من نايم من البارحه

مبطل الدرايش وماد لنا الريوله الجميلة

ودايرها عدنيات من صباح الله خير

ولا يدري اهوا ليش طالع اصلا

بس بما ان كل العالم الصبح تطلع ف اهوا بعد وياهم

طااااااااااااااااخ تداعموا اللي جدامك

و تشتغل الهرنات

لا حول ولا قوة الا بالله

امشو زين ماصار شي ورانا بصمة

وتيي السيارة اللي بعدها اطل فيها

ولا ريال عود كاشخ منشي الغترة او شكلة متقاعد

بس شكل هالسكبة كلها حق جهاد البورصة

وتلقى بس يفلي بهالجرايد

الله يرزقك ان شاء الله ... ويرزقنا وياك

ولي بعدة طالب بالجامعة

مسكين نظارته قاعة بطل

وحيل يحوس اب هالنوتات

و المراجع و الكتب

اهقا ان بكلية العلوم

لأنهم اكثر طلبة الجامعة تعقيدا

الله يسهل امركم يا رب

و تشوف اللي رايء و فايء

ياحليلها ما بقا اللا اتحط لها توتستر بالسيارة

الاكل ترس السيارة اهو صمون اهو كرواسون

او تب قهوة بحضنها

بالعافية بالعافية

اي مسكينه ما يمديها تحط لقمة بحلجها في البيت ولا جان رايح عليها التوقيع

يالله يا جماعة الخير ما بقى شي على البصمة

دييييييييييد ديييييييييييييد هندي براسة دهن

او طاقها سالفة مع الخدامة

والياهل ورا مبطل الدريشة نصه داخل او نصة برا

اشرها على اهلك اللي مأمنين على هالخدم ولا الهنود من يشره عليهم

اللهم طولج يا روح متى نوصل يالله هانت بس بقى شوي

وناس وجناس تمر عليك كل يوم

اشكال غريبة او عجيبة

كل يوم يعيشون معاكم نفس التجربة

بس تذكر انك انت بعد واحد من الناس او مثل مو قاعد تتحلطم

في من يتحلطم عليك

ف طولو بالكم الصبح او وكلوا امركم لله

او صدقوني كلكم بتوصلون الدوام

وتذكر قول رسول صلى الله عليه وسلم

(( الابتسامة في وجه اخيك المسلم صدقة ))

ف خلك سمح مع هالناس وابتسم وان شاء الله الله يفرجها علينا او عليك

وأخيرا التلفزيون بدون سكووووب

أنا كل ما أحط على هالقناة أيني قامت

اليوم أحس القامت راح

أحس أب راحة نفسيه

بغض النظر عن الطريقة اللي وقفة فيها

بس المهم أنها أوقفت

لأنها وسمة عار على الكويت

و افتكينا منها

أهني كل الكويتيين

على اللي صار أو يا عساهم دوم على هالحال و أردا

و كفو عليكم والله

المفروض هالشي يصير من زمان

و دمتم سالمين

و ياحلات التلفزيون بدونج يا سكوووووووب

مهزلة في التربية

يفرض أنها وزارة للتربية وتعليم
وعلمونه من قبل إن المعلم رسول
وان يجب ان يكون قدوة للطلبة
ويكون مثل أعلى لهم في
تصرفاته وأخلاقه
لكن اللي حصل أمس يعكس واقع اللي أتعلمنا
المدرسين في اعتصام
تعطيل العملية التعليمية
سلب الوقت الذي خصص للعلم
و السبب 25 دقيقه !!!!!!
بصراحة مهزلة
وإذا زادوا دوامكم 25 دقيقه شنو راح يصير
عمركم راح ينقص مثلا !!
ساعة النشاط كانت موجودة من أيامنا
أو ما كان في اعتراض أشمعنه الحين
لو قلبكم صج على العملية التعليمية جان بالفعل طبقتوا القرار
خليتوا الطالب يستمتع في ساعة النشاط
و اتهيؤن له الجو المناسب مو اتحسسونه
إن حمل ثقيل عليكم ...
اتعلمون الطلبة بالتمرد على القرارات
و الانصياع لرغبات العشوائية الغير مدروسة !
أو بعدين على شنوا طالبون بزيادة الراتب
و نص معاشاتنا طايرة على الدروس الخصوصية
لو صج كان التدريس أبضمير و بما يرضي الله ورسوله جان قلنا معاكم حق
لكن الطالب يرد من المدرسة ابيض يا فل
ماكو أي استفادة إلا انه
تعلم شغلات خالية عن التربية ...
كلمة شكر أرسلها للجميع المدرسين الذين التزموا في الدوام المدرسي
اشكر وزيرة التربية على كل جهودها
أو بسمي أطالبها بأنها تقوم بمعاقبة كل من تخلف عن الدراسة و ساهمة في تعطيل المسيرة التعليمية

ريح بالك و شتر I phone ;)

بسم الله الرحمن الرحيم


ماكو اجمل او اخف على اللسان من هالكلمات الجميله العطرة


اللي اقدر ابدي فيها كلامي


انقطعت فترة عن الكتابة بس بصراحة


ماني لاقية شي اكتب عنه


او بمعنى اصح زهقت من كل شي


زهقت السياسة او عوار راسها


زهقت الفتن الطائفية اللي كل مالها وتزيد في البلد


زهقت التحلطم على الخدمات اللي مو راضيه تتسنع


ودي اكتب شي امدح فيه ولا يكون فيه مذمة


حتى البلوقات احس وايد خف نشاطها عن قبل


مادري احس الكل حايشته حالت فتور


شرايكم بال I phone 4 ؟؟؟


اادري دخلت عرض


بس على الاقل انغير من اللويه اللي صايره


تدرون انا وحده كنت رافضتا في جميع اشكاله


كانت التليفونات الذكية مسببتلي عقدة بحياتي


مع ان مجال عملي اهوا الاتصالات


او لازم اني اكون مواكبة التكلنوجيا الحديثة


لاكني رافضتا


تدرون لدرجة ان كان عندي نوكيا مال سنة الف وحطبه


اللي الميزة الوحيدة اللي فيه ان اذا طقيتا بالطوفه يرجع لك


كنت اشوف ان بما ان التليفون يدق و يدز مسج


يعني هذا كافي ماله داعي الشغلات الثانيه


او بعدين كل ما اروح مكان يمعه زوارة سوق


اشوف كل من حاط راسه اب البلاك بيري ولا الاي فون او تطقطق


ولا اني عارفه شالمتعه في


او ليش قاعدين يسون جذي


صج ديرتنا ديرت هبات


لين ذاك اليوم تعاندت مع اختي


جان اقوم ادش النت وطلب اي فون


من باب العناد


مع اني كنت راضيه بالغبي اللي كان عندي


او وصل ال اي فون


او من ذاك اليوم وانا ماني قادرة اشلع الصابعي منه


احس ايدي ابروحها تتزحلق عليه


صج حبيته مو بس حبيته الا عشقته


حسيت ان كل الاجهزه اللي مروه علي من قبل اغبية


حسيته يفهمني لقيت فيه كل شي


حسيت اب لذة المسج اللي ابلاش


استمتعت بال Skype


صج جهاز بمعني الكلمة


رساله ابعثها حق كل واحد عنده جهاز غير الاي فون


او بالاخص اهل البلاك بيري


ريح بالك و شتر ا يفون

غنيمة الفلاح في ذمة الله

أنتقلت الى رحمة الله المصورة الكويتية الأخت العزيزه غنيمة الفلاح

غنيمة الفلاح من أبرز المصورين الكويتين

تلميذه من تلاميذ الأستاذ بهاء الدين القزويني

عضوة في نادي بيت لوذان

نشطة بأعمالها الفنية و فازت بالعديد من المسابقات

أنتقلت الى جوار الرحمن يوم الأثنين و هيا متجه الى مقر عملها بحادث سيارة

ما حصلي الشرف بمعرفتها

ولكني كنت من اشد المعجبين بأعمالها

ويشهد لها الكل بأخلاقها او وأبتساماتها اللي ما كانت اتفارقها

لا يسعني ألا الدعاء لها و اتمنى من الكل ادعاء لها




لا إله إلا الله وحده ولا شريك له ,

له الملك وله الحمد وله الفضل وله الثناء الحسن ,

ويميت وهو حي لا يموت بيده الخير

وهو على كل شيء قدير

لا إله إلا الله ولا نعبد إلا إياه مخلصين له الدين ولو كره الكافرون

ولا حول ولا قوة إلا بالله العلي العظيم

اللهم صلي على سيدنا محمد خاتم الأنبياء والمرسلين عليه أفضل الصلاة والتسليم.


اللهم ارحم غنيمة الفلاح رحمه واسعه وتغمدها برحمتك

أرحمها فوق الأرض وتحت الأرض ويوم العرض عليك

اللهم قها عذابك يوم تبعث عبادك

أنزل نورا من نورك عليها

اللهم نور له قبرها ووسع مدخلها وأنس وحشتها

اللهم وأرحم غربتها وشيبتها

اللهم أجعل قبرها روضه من رياض الجنه لاحفره من حفر النار

اللهم اغفر لها وارحمها , واعف عنها وأكرم نزلها

اللهم اغفر ل غنيمة الفلاح وارحمها

وعافها واعف عنها

وأكرم نزلها ووسع مدخلها

واغسلها بالماء والثلج والبرد ونقها من الذنوب والخطايا كما ينقى الثوب الأبيض من الدنس

اللهم جازها بالحسنات إحسانا وبالسيئات عفوا وغفرانا

اللهم عبدتك غنيمة الفلاح أن كانت محسنا فزد في حسناتها وأن كانت مسيئا فتجاوز اللهم عن إساءتها

اللهم افتح أبواب السماء لروحها وأبواب رحمتك وأبواب جنتك أجمعين برحمتك ياأرحم الراحمين

اللهم هذا عبدك خرج من روح الدنيا وسعتها

ومحبوها وأحباؤها فيها إلي ظلمة القبر وماهو لاقيها

كانت تشهد أن لا إله إلا الله وأن محمد عبدك ورسولك وأنت أعلم بها

اللهم يمن كتابها , وهون حسابها , ولين ترابها , وألهمها حسن جوابها

وطيب ثراها وأكرم مثواها واجعل الجنة مستقرها ومأواها.

2/8/1990

في هذا اليوم كان عمري 5 سنوات

ولكن اذكر هاليوم كأن أمس

كان يوم الخميس بالنسبة لنا من اجمل الايام

كنا ننطر الخميس من سبوع لي سبوع

او كان هالخميس بالذات ناطرينه من مده

لأن عيال خالتي رادين من لندن او كنه سنه مو شايفينهم

انا نايمة على سرير بدورين انا نايمه فوق

او اختي تحت

على الساعه 10 تقربا قعدت على بجي امي

او كان ابوي وايها مو نفس كل مره

الابتسامه اللي كنه نقعد عليها اختفت

او ما ني عارفه السبب

أسأل امي تبجي ابوي مو عارف شي يرد علي

اختي الصغيره تبجي مع امي

افتح التلفزيون اشوف شخص غريب

شخص ماعطونه ايا بالروضه

يما هذا منو ؟؟

امي لازالت تبجي

ابوي يرد علي العراقيين دشو علينا

انزين يوبا ليش امي تبجي اهما شنو يبون

مايبون شي اشويه و يردون ديرتهم عادي لا تحاتون !!

انزين يبوا مارح انروح الزوارة اليوم ؟!

ان شاء الله

او صج اثاري ابوي يتلا تعليمات صارمه من يدي

ان ايودينا عندا

او طلعنا من الرميثية لي الروضه و الشوارع فيها دبابات

و الجنود في كل مكان او امي لي الحين تبجي

وصلنا بيت يدي و الكل كان اهناك

او ما يدرون شلي صار او ليش صار

ريل خالتي كان عسكري

ويقول لنا لاتخافون مناورات او بي يردون !!

((اي مناورات يا عمي الديره راحت ))

احنا كنا صغار بس همنا اللعب رحنا دار خالي

كانت دار خالي كلها اثقال او حديد

كنا ناخذ الاثقال ونحذفهم من الدور الثاني وخالاتي يصرخون ويكبرون

على بالهم قصف او كنا ماخذين السالفه لعب

كانو خالاتي بس ماسكين المصاحف او يقرون

عسى الله يفرج علينا همنا

تمينا في بيت يدي

جم يوم

عقبها ابوي قال لازم تطلعون ما راح اخليكم بالكويت

مرنا عمي عادل او خذانا انا او امي او اختي

سلمنا على ابوي ماكنه عارفين اذا بنشوفه بعد هاليوم ولا لأ

كان اصعب وداع

طول الدرب كان دبابات او جنود او رشاشات

شغلات ماتعودنا انشوفها

كان الرعب في كل مكان

اصعب لحظه يوم وصلنا الحدود السعودية

جان اتيي سيارة وتحذف علينا عصير او صمون

كنا نبجي مو مصدقين اللي قاعدين انشوفه

احنا يصير فينا جذي

احنا كويتين

احنا عيال جابر الخير جذي يكون حالنا

عزت نفسنا ما خلتنا ناخذ منا
احنا نعطي ما ناخذ

قعدنا بالسعودية فترة كنا انروح الحدود اندق تليفون على الديره

كانت كل المكالمه بجي اندق على خالاتي انقولهم بنرد لكم

او اهما يبجون ايقولون بيون لنا

ابوي تم بالكويت طول الفترة وكان مع المقاومه

عمي كان ياخذ زيت سيارات ويدهنا بالصمون ويحط بطول ماي بالثلاجه ويحط فيها ديتول

ويوزعها على نقاط التفتيش

لين اخر شي عممو عليه العراقيين

طلعنا من السعودية او رحتا الامارات او درسنا

اهناك كانت من اصعب اللحظات ان الكل يوقف ويحي علم الامارات

واحنا انصارخ اب اعلى حسنا ونقول

وطني الكويت سلمت للمجدِ ...

اللي سوو العراقيين فينا

لو يمر 100 سنه على اللي صار ماراح ننساه

شي لي الحين محفور في ذاكرتنا او عمره ماراح ينمسح

راح يتم تاريخ 2/8 وسمت عار في تاريخ العروبه

منها عرفنا ان ماكو أمة عربية !!!

صج عرفنا منو اللي معانا او منو اللي علينا

او لا تقولون الغزو الصدامي

احنا ما شفنا صدام احنا شفنا العراقيين اللي دشو علينا

اهما اللي باقونا


اهما اللي اغتصبو بناتنا

او ذبحو عيالنا

شردونا

دمرو بلادنا

الله لايعود علينا هل الايام

اللهم احفظ الكويت من كل مكروه

و الرحم شهدائنا وسكنهم في فسيح جناتك يا أرحم الراحمين

كوكتيل..

في البداية ابارك للأخ خالد الفضالة

وانا بعد وياك (( ولي وطن آليت ألا أبيعه ))

ثانيا انهني الثيران (( الاسبان )) على الكاس

و الله او سواها بولو

او ماعليه الالمان كانوا الثالث على الاقل تتوج

ما نطق اب 4 اوطلع

في مليون شغله او شغله تفتر اب خارطة مخي

راح احاول اجمعها في هل البوست

ليش بالكويت ما تتجرأ تخطر الشارع
حتى لو كنت في حارة المشاة؟

شنو راح ايحصل اذا تجرأت او سويتها

1- هرنات من اتحط ريلك على القار

2- فلشرات

3- تشوه او عاه مستديمه لأنك اكيد راح تنداس

4- حتما راح اتكون في الصليبيخات

ليش اذا كنت بالسيارة او تبي اتلف يمين
او كنت محترم و ستخدمت الاشاره شنو راح يصير فيك ؟

1- محد راح يعطيك ويه

2- السياره اللي وراك راح يدوس حد الدوسه ( لعانه مو ألا اتلف )

3- احتمال وانت اتشوف يمينك على شان بتلف اللي جدامك يصكك ابريك يدخلك بالدعاميه

شنو يصير اذا بنت حطت صورتها بالنت
قبل 10 سنين
1- فيها قبايل

2- قلة ادب

3- الاخو يدش فيها مركزي

4- باختصار توصل لي الستار

الحين
1- حدها ستايل

2- اصلن عيب اذا ماحطت صورتها فشله !

3- الاخو يعلق على الصورة بالفيس بوك والله اختي صايره حلوه اليوم !!

4- رفيج الاخو يرد يعلق أي والله وايد حلوه وين مصورتها !

اكو دولة بالعالم اتمشي شرطي ورا كل شرطية !!

في البداية كان هناك اعتراضات من البعض

على الشرطة النسائية

انا عن نفسي من المؤيدين للشرطة النسائية

و الحين طلعوا لنا في سالفة المجمعات

شي حلو ان يخلونهم يختلطون مع المجتمع

لكن سالفة التحرشات دليل على عدم التربية

ولحل هذي الظاهره لازم يطبق القانون

لأن يعتبر تعرض لموظف اثناء اداء عملة

لو تم تفعيل هذا القانون ماكنه راح انشوف الهلاقة اللي صايره الحين

و كل من بي يحترم نفسه

مو نمشي وراهم بدي قاردات


سوري يمكن البوست لويه و لاشي

له شغل باللي قبله

ماقول ألا..

ريح بالك وشرب لموووووون